Loluwari Média (Díli) – Prezidente Asosiasaun Arbitrajen Futeból Timor-Leste (AAF-TL) Nivio da Costa, hatete, AAF-TL nu’udar membru ba Federasaun Futeból Timor-Leste (FFTL) ne’ebé goza tu’ir nia estatutu no rejimentu interna maibé Komisaun Organizadora Taxa Avo Nana tinan 2025 nunka konsidera katak Asosiasaun Arbitrajen Futeból Timor-Leste (AAFTL) mak nu’udar organizasaun ida ne’ebé iha kompetensia tomak hodi organiza, kapasita no valida árbitru hodi lidera kompetisaun ofisial sira ne’ebé realiza iha Timor-Leste. Tanba ne’e iha dezentendimentu entre Komisaun Organizadora Taxa kopa Avo Nana ne’ebé daudaun sai polemika iha publiku.
“Asosiasaun Arbitrajen Futebol Timor-Leste (AAF-TL) nu’udar organizasaun ida ne’ebé sai mahon ba ekipa arbitrajen hotu iha tentoriu Timor laran tomak, ami hakotu akordu servisu hamutuk ho Komisaun Organizadora ba Kompetisaun Taxa Rotativa Avo Nana Nasional 2025.” Dehan Prezidente Asosiasaun Arbitrajen Futebol Timor-Leste (AAF-TL), Nivio da Costa, ba jornalista sira, iha salaun Xanana Sport Center foin lalais ne’e.
Nia hatete, involvimentu ekipa arbitrajen iha kompetisaun ofisial sira iha teritoriu rai laran, hahu husi nivel suku, postu administrativu, munisipiu, Nasionál inklui Liga Nasional sira ne’ebé realiza, kabe ba kompetensia AAF-TL.
“Ami hakotu akordu servisu hamutuk ho Komisaun Organizadora ba Kompetisaun Taxa Rotativa Avo Nana Nasional 2025.”
Komisaun Organizadora Taxa Avo Nana tinan 2025 nunka konsidera Asosiasaun Arbitrajen Futebol Timor-Leste (AAFTL) mak nu’udar organizasaun ida ne’ebé iha kompetensia tomak hodi organiza, kapasita no valida árbitru hodi lidera kompetisaun ofisial sira ne’ebé realiza iha Timor-Leste. Situasaun ne’e akontese husi kedas tinan kotuk 2024.
“Ho attitude ne’ebé sita iha leten, lori Prezidente Komisaun Organizadora ho inisiativa halo aprosimasaun individu ba kada arbitru sira hodi bele asegura abertura taxa Avo Nana iha tinan 2024 no 2025 ne’ebé tu’ir loloos Komisaun Organizadora tenke iha Akordu Servisu Hamutuk ho AAFTL nune’e bele difini direitu no dever husi parte rua.”
“AAF-TL laiha kuñesimentu kona-ba enkontru tekniku sira ne’ebé tu’ir loloos nu’udar momentu importante ida ba AAFTL hodi halo aprezentasaun ba mudansa regulamentu jogu sira infelizmente situasaun ne’e la akontese.”
“Akordu servisu hamutuk foin bele asina hafoin abertura taxa Avo Nana iha Gleno Ermera ne’e hatudu KO la tau importansia involvimentu ekipa arbitrajen iha kompetisaun Taxa Avo Nana 2025.”
Akordu ne’e asina, ekipa arbitrajen hala’o nia kna’ar ho responsabilidade no kontinua husu parte KO atu asegura kompetisaun liuhusi pedidu apoiu PNTL nune’e kompetisaun ne’e bele susesu maibé infelizmente proposta ne’e ladun tau atensaun husi KO.
“Ami konsidera katak Prezidente KO iha konflitu interese iha kompetisaun sira ne’ebé iha ligasaun ho Klubu FC Laleia ne’ebé iha ligasaun emosional direita ho Prezidente Komisaun Organizadora.”
“AAFTL konsidera laiha separasaun poder husi Prezidente KO taxa Avo Nana. Tanba nu’udar prezidente KO bele halo funsaun hanesan dirijente ba Klubu FC Laleia no ate bele hola papel nu’udar Asistente Referee iha loron 6 Abril 2025.”
“Asosiasaun Arbitragem Futeból Timor-Leste durante ne’e kolaborasaun di’ak ho FFTL no hetan apoiu māximu husi Prezidente Federasaun Futeból Timor-Leste iha atividade no knaar hotu ne’ebé hala’o. Ami iha kompromisiu atu servisu nafatin tu’ir regulamentu no regra síra ne’ebé hatuur ona husi FFTL, hodi nune’e bele kria futeból ida ne’ebé ho kualidade, justu no transparente liu iha Timor-Leste.”
Jornalista : Chay Risky