Loluwari Média (Likisa) – LIAN halerik kiik ida ne’ebé loron kalan sai kmook de’it iha baraka ida ne’ebé satan de’it ho nu’u tahan iha Aldeia Kaikasabou Suku Gisu Postu Administrativu Loes, Munisípiu Liquiça
Tinan 10 resin, Ines Lopes (72) no Isabel dos Santos (75) nu’udar Bin-Alin ne’ebé ho kondisaun moras Defisiente mentál, tahan udan been hodi hein see loos mak atu hamaran sira nia matan-been?
Bin-Alin na’in rua ne’e laiha oan tanba la forma familia no nia Alin feto ikun ne’ebé forma familia ona mós dook husi sira tanba Bin-Alin na’in tolu ne’e familia rasik mate hotu ona.
“Tempu udan ami bokon hotu, ami tur de’it (la toba) dala-ruma ami sunu ahi haneruk de’it to’o loron” konversa badak entre Ines, Isabel ho Jornalista Loluwari.tl iha Aldeia Kaikasabou foin lalais ne’e.
Sira laos tahan udan-been, maibé tahan mós Ai-han ne’ebé susar tebes atu hetan no uza de’it Ahi solar panel iha tempu kalan.
“Dala-ruma Ami hein udan para mak ami tein se lae ami buka nu’u tahan mak ami sunu ahi hodi tein”konta ho matan-been.
Viziñu,Felisberto Ximenes, rekoñese avó na’in rua ne’e nia terus tanba nia parte sempre tulun sira.
“Nia familia sira dook husi sira bainhira tempu hamlaha kuitadu sira na’in rua atu ba husu loos iha se?” dehan nia.
Felisberto triste bainhira haree ba Realidade moris avó na’in rua ne’e tanba nia konsidera hanesan nia inan.
“Ema atu mai ajuda ama na’in rua ne’e laiha tanba imi haree rasik ho matan kondisaun distansia mós dook tebes entaun hanesan vizinu ami mak ajuda malu maske la barak”dehan nia.
Halerik ne’e fanu Fundadór Fundasaun Ran Amigo Karidade (FURAK), Januario Soares nia fuan no vontade lori nia ekipa karitativa hodi hakbesik ba sira.
“Ba ita, ida ne’e hanesan asisténsia ne’ebé mak derepente,laiha planu tanba akontese dunik situasaun avó na’in rua hasoru,presiza duni ita nia ajuda imediata ita tenke halo dunik”dehan Jovens foinsae ne’e.
Stuasaun ne’e halo Fundadór FURAK Januario Soares lakoi atu tur nonok bainhira haree avó na’in nia terus.
“Bainhira ha’u haree uma avó na’in rua ne’e ha’u labele atu husik liu tanba ho situasaun ne’ebé mak ita haree ne’e vulneravel presiza tebes tau atensaun ne’ebé di’ak ”
Tanba ne’e uma ne’ebé Fundasaun FURAK harii ba avó na’in ne’e ho medida 4×6 ne’ebé ho fasilidade hanesan kulsaun,sumasu,manta,lipa,bikan,sana no sasan báziku sira seluk.
Durante loron tolu halo uma ne’ebé mós ajuda husi Falintil Forsa Defeza Timor-Leste (F-FDTL) na’in 6 inklui komunidade sira ho gastus orsamentu hamutuk rihun rua resin no Uma ne’e ho estenga parede kuartu ida no veranda iha liur ida.
Xefe Aldeia Kaikasabou, Nicolau Dos Reis Gama esforsu hodi aprezenta ona preokupasaun avó na’in rua ne’e ba Ministériu Solidaridade Sosiál inkluzaun Munisípiu Liquiça maibé seidauk bele rezolve.
Nia haktuir,MSSI konsege apoiu nesesidade báziku iha tinan kotuk maibé kona-ba osan idozu nian seidauk bele rezolve.
“Hanesan Autoridade Lokál sempre observa ba situasaun komunidade inan na’in 2 ne’ebé sira enfrenta,uma ne’ebé kondisaun grave,ha’u fó hatene ona ba Parte Relevante liu-liu Ministériu Solidaridade Sosiál inkluzaun Munisípiu Liquiça nian maibé sira mai apoiu Fós, Mina no Supreme de’it”dehan nia.
Xefe aldeia ne’e agradese ba ekipa fundasaun FURAK tanba bele hakmaan ona nia komunidade nia moris ne’ebé moris ho situasaun vulneravel.
Jornalista : Cesar Pires
Editór : Herminio Cardoso